FERÐIR OG GISTING

Ísland hefur um langt skeið verið í fararbroddi þjóða heims á sviði fiskveiða og nú fiskeldis. Hafið er miðlægt í menningu þjóðarinnar, efnahagskerfi og sjálfsmynd. Í krafti þess að vera umlukið mörgum gjöfulustu fiskimiðum Norður-Atlantshafsins hefur landið byggt upp orðstír á alþjóðavísu fyrir ábyrga fiskveiðistjórnun, nýsköpun í vinnslu sjávarafurða og þróun sjálfbærs fiskeldis. Íslendingar flytja nú út hágæða sjávarafurðir til markaða vítt og breitt um heiminn og halda áfram að vera leiðandi í rannsóknum, tækniþróun og starfsháttum sem tryggja að auðlindir sjávar haldist heilbrigðar til langframa.

Reykjavík er nyrsta höfuðborg Evrópu en þó styttra á milli hennar og New York heldur en á milli New York og Los Angeles á landakortinu. Flug frá helstu borgum Evrópu til Íslands tekur yfirleitt aðeins 2-5 klukkustundir.

Reykjavík er gestrisin borg með alþjóðlegum blæ. Á höfuðborgarsvæðinu búa um 260 þúsund manns í sjö sveitafélögum. Þar má finna hágæða hótel og veitingastaði, iðandi næturlíf, metnaðarfull leikhús og áhugaverða staði til að heimsækja og skoða. Skammt frá borginni er einn vinsælasti viðkomustaður ferðamanna, Bláa lónið.