NÁMSSTYRKIR ICEFISH 2026

Í ár veitti IceFish-sýningin þrjá styrki til framhaldsmenntunar fyrir nemendur sem hafa lokið prófi í fiskitækni eða sambærilegri prófgráðu í sjávarútvegsfræðum, fiskvinnslu eða fiskeldi, og hyggja á framhaldsnám sem gagnast getur íslenskum sjávarútvegsiðnaði og atvinnulífi.

Hver styrkur hljóðar upp á 300 þúsund krónur og eru þeir veittir efnilegum nemum til að standa straum af kostnaði við annað árið af tveimur í framhaldsnámi í eftirfarandi greinum við Fisktækniskólann:

a) nám í vinnslutækni hjá Marel

b) nám í gæðastjórnun eða

c) nám í fiskeldi

Styrkirnir eru borgaðir út í tvennu lagi, gegn annars vegar kvittun/staðfestingu á greiðslu skólagjalda fyrsta námsmisseris ársins 2026, og hins vegar gegn kvittun/staðfestingu á greiðslu skólagjalda fyrir seinna námsmisseri. Styrkur fyrir annað misseri er aðeins greiddur út ef styrkþegi hefur lokið námi á fyrsta misseri með fullnægjandi árangri.

Umsóknir um styrki voru metnar af sérhæfðri dómnefnd sem skipuð er fagfólki í sjávarútvegi. Í henni sitja m.a. Klemenz Sæmundsson, skólastjóri Fisktækniskólans, Hrefna Karlsdóttir, yfirsérfræðingur hjá Samtökum fyrirtækja í sjávarútvegi, Kjartan Sveinsson, formaður Landssambands smábátaeigenda, og Bjarni Jónsson, fulltrúi Íslensku sjávarútvegs-og fiskeldissýningarinnar, IceFish.

Eftirfarandi þættir voru teknir til greina við matið:

1) Árangur í grunnnámi (Fisktækni), a) lokið námi eða b) verkleg færni

2) Starfsreynsla

3) Framtíðaráform (um nám eða vinnu)

4) Fjárhagslegur stuðningur frá öðrum (fyrirtækjum eða sjóðum)

5) Meðmæli (starf/nám)

Nánari upplýsingar um ofangreindar námsleiðir Fisktækniskólans má finna á vefsíðunni www.fiskt.is.